靓样大芒、轻薄价平三星 Galaxy Book 被低估的家用工作笔电!

2021-06-23 10:19:32

最近好多网友闹我,介绍咁多笔电都有一个共同的缺点,就係价钱过万觉得偏高。 其实呢个唔係产品缺点,而係我地荷包缺点呀! 不过,如果你正在寻找一部大芒、样子又靓仔、轻薄续航力好的话,三星最新推出的 2021 笔电系列中,有一款八千蚊有找的 Galaxy Book 绝对係严重被低估的产品。 虽然行货係 5 月 14 日先正式开卖,但我一早忍唔住抢先借来韩国版真机进行实测!



无得开箱
三星最近一炮推出三款新笔电,分别是 Galaxy Book Pro 360、Galaxy Book Pro 和 Galaxy Book 系列。 全人类目光聚焦係前面两款,毕竟是旗舰定位的超商务笔电,但其实被遗忘的三哥先係最吸引到预算不足的用户。 版主早前贴出的资讯大家不妨过去睇多次,而今次我借到手的却不是开卖的版本,而係正宗韩版笔电,运行 i3 处理器和 Nvidia 独显,规格上跟港版不同。卖的一共有两个处理器版本:i5-1135G7 和 i7-1165G7,分别是 7780 元 和 8780 元,并没有独显卡。


▲ 一部最厚只有 15.4mm 的平价 15.6 吋大芒笔电,配合 1.6kg 的轻量,轻过 Macbook Pro 又薄过 Macbook Pro。


▲ 最抵死係三星重新设计火牛线路和组件,一个 65W 笔电用火牛竟然做到以爲係手机 USB 火牛咁迷你。


▲ 平价机都无偷工减料,而係跟足潮流加入 USB-C to USB-C 的充电模式。


▲ 提供 5V/3A、9V/3A、15V/3A 和 20V/3.25A 四种输出模式;真係好细旧,从来未见过咁细的笔电火牛。


真机外观
係屋企用笔电,好多人都希望芒够大。传统上好多 desktop replacement 类的笔电都係又大又厚,外观亦欠缺「轻型」设计概念。而今次 Galaxy Book 绝对係外型先决,但有样之外同样有实力。 机身亦加入好多商务机重视的元素,包括齐全 I/O 接口、全 180 度摊平屏幕等,配合金属外壳设计,完全係一部被忽视的平价高质家用工作机。


▲ 简洁的 SAMSUNG 标誌;港行拥有两种颜色,分别是雾光蓝、雾光银,而我到手的当然是蓝色; 顶盖磨砂金属质感非常舒服。


▲ 底部一样是磨砂蓝的配色,仲有一堆贴纸标籤;左右两侧是支持 Dolby Atmos 的双喇叭。


▲ 韩文我就唔识,但都知道佢係韩文,毕竟手上的是开卖前偷跑的国际试作机 ~
 

​▲ 散热用风口亦相当美观,只有简单一列的屡空条纹,而四角附上方正接触面积的防滑胶。


​▲ 机身并没有採用下沉式转轴,这个设计很适合长期平放在檯面。 


​▲ 机身最厚只有 15.4mm 我觉得係黐线,网友可能睇完上面两张图都未必真正感受到呢个厚度带给我的震撼程度! 比两个其他品牌的笔电数据大家参考下:LG GRAM 同级 16-16 吋屏幕都要 17.78mm 厚,号称超薄级 Acer 15.6 吋 Swift 5 笔电 15.9mm,所以三星呢部 Galaxy Book 的纤薄程度相当惊人。


​▲ 接口齐全都係 Galaxy Book 的优点:左侧有 USB-C X 2、HDMI 输出、USB-A 接口。


​▲ 右侧有安全锁、另一组 USB-A、3.5mm combo jack 和 microSD 卡槽;硬件上亦支持 WiFi 6 和蓝牙 5.1 规格。


内部布局

​▲ 商务机比较热门的全 180 度摊平屏幕设计,竟然可以係部 15.6 吋大芒笔电见到。


​▲ 这块 15.6 吋全高清 LCD 屏幕,达 170 度可视角度,再配合磨砂防眩光技术,不论是睇电影或者睇文书档案都相当舒服。


​▲ 全铝金属机身加持,亦更可靠地支持三边超窄框设计。


​▲ 严格黎讲,屏幕下方边框唔算阔,可能爲左放 「SAMSUNG」个 Logo 所以先保留,哈哈 ~


​▲ 提供 720p 高清解像度的镜头当然唔係乜劲料,但你见唔见到镜头旁边的收音咪,Galaxy Book 拥有商务机常见的智能降噪功能,可以针对性区分人声以外的杂音,可以更好地应付家居开会的需求。


​▲ 一般 15.6 吋屏幕笔电都具备数字键盘,方便你炒股票入代号,亦方便 Excel 文书输入。


▲ 背光键盘手感一般,对男性用户黎讲应该是键感太轻,无乜明显的反馈感,会比较适合指力比较弱的女性用户使用。 


▲ 触控板面积足够大,你见容纳得晒本 YK 大手掌就知喇!


▲ 要注意,港行只有核显版本,Nvidia 独显只有韩国偷跑机先有咋! 港行买到的是更强劲的 i5 和 i7 版,而本 YK 极度同意三星推出无独显版本的决定,下面会有进一步解释。


▲ 但要留意係爲了迁就紧凑的机体,Galaxy Book 数字键盘的布局并非传统方案,确实需要几天的时间适应。


各项性能测试 
规格一览
事先讲多次,港行并无提供 i3 + 独显的版本,呢部係韩国版 Galaxy Book 黎。最特别的地方係,我从来未玩过 Intel 第 11 代的 i3 处理器,而且我都想知道到底 MX450 独立显示卡性能同 11 代内显单元差距几大。 性能测试结果都可以比大家做一个参考。 


▲ 过往几部测试的 11 代 Intel 处理器都係 i7-1165G7,今次反串黎一个 i3-1115G4 双核心处理器,同样採用最新的 10nm 製程。(港行会採用 i5-1135G7 和 i7-1165G7)


▲ 今代 i3 拥有 6MB Smart Cache 快取记忆体。


▲ 部机可以做到咁薄,主机板自然係三星自家定製的产物。


▲ 入门 U 配入门 RAM,机身拥有四通道模式的 8GB 记忆体,如果要睇片做野玩多工操作肯定唔足够,所以三星引入係 16GB RAM 版本!


▲ 韩国版拥有 MX450 独立显示卡(咁薄都有独立显示单元,黐线),而港行係无呢样野,我係高度讚赏呢种做法,下面跑完分你就知道点解。

开机速度

▲ 开机只需要 9 秒就完成系统啓动,相当高速的表现; 再过 23 秒先完成载入程序,以非旗舰机定位黎讲,呢个速度令人满意。

综合性能

▲ 在 Novabench 综合性能测试中,呢部 Galaxy Book 获得 1729 分,对比同代 i7 处理器自然分数上慢,但实际体验速度却依然不错。「i3 都咁 X 爽,咁 i5、i7 咪不得了?」呢个係我玩几日后的评语。 

SSD 测试

▲ 轻薄机身下对 SSD 温度控制可以话係相当大的考验,而 Galaxy Book 实时检测是摄氏 34 度,採用翻自家的 SSD 组件。 你可能会话 256GB 边度足够呢? 梗係唔够喇! 所以行货係跟 512GB NVMe 固态硬碟。


▲ 在连续读写结果中,Galaxy Book 获得 2587mB/s 和 1200mB/s 的成绩;而多工随机读写 (4K Q32T1)达 447mB/s 和 407mB/s 速度,随机读写有呢个速度真係吓死人,其他品牌旗舰机都未必做得到。

CPU 处理器性能
到左最令我期待的环节,实测到底 11 代 i3 处理器性能有几好?而比较有趣係 11 代 i3 处理器亦支持厂商主动调整功耗,最高可以去到 28W 火力输出,但一般情况下考虑到发热量问题,厂商的调教都会偏向保守策略。


▲ 傻左,多核心测试中 i3-1115G4 竟然跑得出 3310 分,你要记住佢係一个双核心处理器,但跑出黎分数同四核心的 i7 15W 版处理器的 3769 分差距并不大,但就唔知道係 Intel 11th i3 黐线定三星黐线。


▲ 至于单核心表现都相当满意,达到 1084 分的水平,作爲一粒 i3 可以话係收晒货,普通日常文书睇片上网绝对难唔到佢。

GPU 图像处理性能

▲ 我係上面大讚三星唔引入独显版係智者之举,你睇到 Basemark GPU 4K DirectX 12 测试中,MX450 只係得到 1135 分咋! 如果係 i7-1165G7 粒 iRis Xe内显都有 11XX 分水平。


▲ 唔好话 i7 粒内显,连 i3 粒 UHD 显示单元都有成 933 分,完美说明 Nvidia 块 MX450 真係多旧鱼,浪费电力之余,仲会可能有撞 Driver 问题的风险。 所以,版大家可以安心入货。

电力续航测试

▲ 三星官方声称电池配备高达 54Whr 容量,亦属于自家出品的电池;一贯对 Desktop Replacement 的印象係续航废,毕竟预左你拖住 AC 电源长期放係屋企用,从来无考虑过临时出街的可能性。


▲ 但呢部机竟然可以係 Full Load 测试中跑出接近 9 小时的成绩,当然 i3 会比 i5 和 i7 省电,但以一部平价大芒机黎讲呢个续航力相当不错。


▲ 而利用 Chrome 做播放指定的 720p 解析度 Youtube 影片恆常测试中(手动调整亮度最暗、WiFi 隔离),过了 60 分钟后 Galaxy Book 仲有 96% 电量。 意味住最高续航力可以达到 20 小时,收晒货喇、超出晒预期喇!


结论
好耐未试过有一部大芒笔电係令我係各方面都相当满意,满意唔係因爲佢性能爆錶,又或者薄到喊、又或者续航力超强。 一部性能平衡、造工扎实、价钱宜人的笔电,本 YK 经常都话三星最近几年推出的笔电产品,都可以见到佢全力进攻的野心和决心。 三星笔电产品确实屡有惊喜,而且无「头大身细」的产品。 

今次推出的 Galaxy Book 是「MORE THAN ABOVE AVERAGE」:机身轻薄、全金属外壳、充足的记忆体和 SSD 容量(可扩充)、喇叭音效立体有力、续航力亦有惊喜。 可惜係偷跑评测未能获得 Galaxy Book 港行版完整的体验。 虽然呢部机价钱平,但完整的三星产品体验佢係有比足你,包括 IoT 控制中心 SmartThings 和平板当芒洗 Second Screen 功能,而具有配合三星手机高速传送档案的 Quick Share。 

题外话,Galaxy Book 有官网开卖优惠,限时送 ITFIT TWST808 真无线耳机和无线滑鼠一个。 我就唔建议大家爲赠品而买机,最好係落去专门店摸过部真机再决定,可能你都会好似我咁比佢靓仔机身震撼到。
 

郑重声明:本文版权归原作者所有,转载文章仅为传播更多信息之目的,如作者信息标记有误,请第一时间联系我们修改或删除,多谢。